Jeeran Blog

“الفن علاج”

Monday, February 5th, 2018

Shahd Dawood at Sararash Art

“بلشت شغلي قبل عشر سنين، أول إشي كنت أشتغل بالبيت بس الألوان بحتاجوا مكان واسع ومكان إنت مو خايف توسخه، ففتحت استوديو صغير بالصويفية. بهديك الفترة كنت بشتغل بشركة وما كنت مبسوطة، أنا ما بعرف أقعد ورا مكتب. كنت عارفة شو بدي وعارفة وين شغفي فطلعت من الشركة. الوضع ما كان سهل أبداً، الأدوات تاعون الفنانين غالية ومكلفة.

نقلت على جبل عمان بين 2012 و 2013 لفترة وكبر الموضوع وصار استوديو و showroom. نقلت بـ 2016 على أم أذينة، المنطقة أهدى وأنا بحب أرسم على رواق، المكان هون أوسع وأكبر. أهلي أول ناس شجعوني ودعموني من أول ما بلشت. من وأنا ضغيرة بالمدرسة كنت أحب الفن وكنت شاطرة في. في ناس بعتبروا الفن إشي مش مهم، بس هو كتير مهم وهو وسيلة علاج ومن أقوى أنواع العلاج النفسي.

الإشي اللي رجعلي من شغلي هو “أنا”. أنا لما أحط تبعي، انا اللي بعكس الصورة اللي جواه. دائماً بحاول أطلع الطاقة الايجابية، الحب والأشياء الحلوة. أكتر إشي بيعطيني الإلهام هو الغروب، ألوان الشمس، الغيوم. إلهامي الطبيعة بشكل عام.بحب أشتغل بإيدي، بحب أعمل كل إشي لحالي، مش بس اللوحات، حتى التسويق والبيع. مش سهل آجي أحكي لحدا يبيعلي إشي لإنه هاد مش بس شغل، هاد شغف. صعب تشرح لحدا هاد شو بعنيلك أو يوَّصل نفس الفكرة اللي أنا بدي أوصلها.

بحب الناس تعرف إنه “الفن علاج” الفن أحلى إشي صار بحياتي، ما بتخيل حالي بعمل إشي تاني أو بدون سراراش. كل ما أعمل إشي جديد بصير أحلى، كل ما بكتشف إشي جديد بصير أحلى. الفن مش بس رسم، الفن تجربة. أنا فخورة جداً بسراراش ولوين وصلت بالعشر سنين، ما راح تعبي عالفاضي.”

- شهد الداوود

صفحة سراراش على جيران: http://jo.jeeran.com/en/p/sararash-art-amman/

Leave a comment