Jeeran Blog

من مكتبة صغيرة إلى Archi Arts

Wednesday, April 11th, 2018

“بلشنا Archi Arts بـ 2006، وكانت الفكرة مبنية على أساس الموقع اللي إحنا أخذناه مقابل كلية الهندسة في الجامعة الأردنية. فحبينا نحط الاسم “العمارة والفنون” بما يتناسب مع طبيعة العمل اللي إحنا بنشتغله. ما كان إلها خطة عميقة لأكون صريح، كانت الفكرة عبارة مكتبة تخدم الطلاب اللي بدرسوا عمارة وغرافيك وتصميم داخلي والفنون بشكل عام.

كنت قريب من كلية الهندسة بطبيعة سكني وحياتي. كنت أعرف كم حد بيدرس عمارة أو فنون، كان وقتها بتواجههم مشاكل مثل صعوبة الوصول لإشي جودته عالية ويكون قريب عليهم بنفس الوقت، وصرت أشوف إنه الشغل معهم وبهاد المجال ممكن يكون إشي منيح ومفيد. أول ما فتحنا كانت المكتبة صغيرة، قسم الطباعة لما بلشنا فيه كان عبارة عن جهاز كمبيوتر وطابعة تطبع لغاية A3 وطابعة تطبع Black.

كبر الموضوع بعدين عن طريق تتبع الطلب والملاحظة، من قرطاسية لتخصص أعمق متل الفنون اللي توسعنا فيه بشكل عام، بعدين دخلنا في الطباعة. صرنا نتوسع وصرنا ندرك طبيعة الخدمات اللي بطلبوها الطلاب، والحمد لله، إحنا نعتبر هلأ أكبر Copy Center. هلأ طبيعة عملنا تغيرت كلياً، صرنا نشتغل (Business to Business (B2B ووقعنا اتفاقيات مع مؤسسات أجنبية تقدر جودة خدمتنا.

إحنا بنشتغل بمبدأ الجودة ومبدأ الابتكار. دائما عنّا حرص على الجودة، لإنها أمانة لازم نشتغل عليها. للأسف، في ناس بتعتبر مسألة الجودة إشي مش أساسي. من أكبر التحديات اللي واجهتنا لما بلشنا هي الكوادر. مش متوفرة كوادر مهنية تحترم العمل وتحترم المبادئ اللي حكينا عنها: الأمانة في الجودة وبالوقت ونحترم المجتمع اللي إحنا بنعيش فيه. والتحدي التاني إنه الزبون نفسه ما عم يميز ما بين الراقي والعادي.

إشي بحب الناس تعرفه عن Archi Arts هو احترامنا للمواصفات والمقاييس واحترامنا للبيئة من خلال تطبيق مبدأ المنتجات الـ Eco Friendly، كل شي بتشوفوا هون هو منتج صديق للبيئة. كأي مشروع حابب نكون أكثر تركيز بالمستقبل وبالذات في مجال التصميم، لإنه التصميم يعتبر من المشاكل الكبيرة في مجتمعنا وإن شاء الله نستمر بالنجاح في هذا المجال.”

- رمزي صافي

صفحة Archi Artsعلى جيران: http://jo.jeeran.com/p/archi-arts-2-amman/

http://jo.jeeran.com/p/archi-arts-3-amman/

Leave a comment