Jeeran Blog

خمس أسئلة مع أيمن طقطاقة، صاحب رومي كافيه.

Thursday, October 12th, 2017

أيمن طقطاقة، صاحب رومي كافيه

شو اللي ألهمك إنك تفتح رومي؟

بـ 2011 إجيت عاللويبدة وعجبني جو اللويبدة كله عبعض، فن العمارة والتاريخ وأنا بهمني الفن المعماري لللويبدة. قبل رومي، المحل الأول اللي فتحنا بـ2011 كان أوليفا اللي هو مطعم ايطالي، أثناء هاي الفترة -وهاي كانت القصة اللي خلقت رومي-  كان عندي Cafetiera اللي هي ماكينة الاسبريسو اليدوية اللي بتنحط عالغاز، كل يوم كنت بعمل قهوة فيها مع الجيران وكان بيجي أصدقاء من الشغل على أوليفا ونشرب معهم. فمن الفكرة هاي تعرفت على صديق لبناني اسمه شفيق وبلشنا كل يوم نشرب قهوة، وأنا بعشق القهوة من زمان كفكرة وكمشروب; فكرة المقهى إنك تشوف الناس، تحكي معهم ويكون في تعددية. فإجت فكرة إنه أعمل رومي وفتحته بالـ 2013 وكانت هاي الماكينة مع المحل وكان الوحي كله ييجي منها. الماكينة انعمل عليها مش أقل من 5000 مرة وما زلت بحتفظ فيها لهلأ.

ليش اخترت رومي كإسم للمحل؟

رومي الهدف منه كان إنه يكون أول كوفي بار بعمان،  سمينا رومي نسبة لجلال الدين الرومي لإنه كان مُحب وبالأساس الفكرة كانت إنه إحنا بنحب الجميع، ما في عنا أحزاب ولا توجهات ما في أي وسم للمحل، الكل موجود بدون ما نعمل فئات للناس، رومي هو القهوة تبعت الحي اللي عالزاوية اللي بالويبدة اللي ما إلها آرمة لليوم.

شو الإشي اللي بميز رومي عن الأماكن التانية؟

من الأشياء الجميلة برومي إنه الكل بعرف بعض أو بتعرفوا عبعض من خلال حديث، وبجوز في تقريباً عشر أزواج تعرفوا عبعض برومي وتزوجوا. ورومي باليوم بدخل عليه 27 جنسية على الأقل وعنا ناس اهتماماتهم مختلفة وأعمارهم مختلفة عندك زباين من عمر ال20 للـ 88 سنة، في عنا زبونة تقريباً عمرها 78 سنة كل يوم الصبح بتيجي بتاخد كاباتشينو من عنا. هاد التنوع صعب تلاقي بأماكن في عمان.

كيف بتحس إنه رومي غير بحياتك أو بالمجتمع؟

رومي القيمة الإضافية اللي عملها للمجتمع إنه كان أول كوفي شوب بدارة الفنون، وأول كوفي شوب في الأردن داخل مكتبة واللي هي مكتبة شومان وانعمل ليتناسب مع المكتبة وليناسب ويخدم الطلاب بأسعار رخيصة كتير وهو مشروع مش تجاري إحنا مقدمينه دعم للطلاب.

شو مشاريعكم المستقبلية لرومي؟

رومي مش franchise وبنفس الوقت لو بدو ينفتحله أفرع غير، رح ينفتح بمكان ثقافي أو فني مش كمكان تجاري.

صفحة رومي على جيران:  http://jo.jeeran.com/p/rumi-coffee-bar-amman/

Leave a comment